عدد الزوار
زيارات مشاهدة المحتوى : 175561
|
كتبها Administrator
|
|
الثلاثاء, 05 مايو 2009 15:58 |
|
بقلم بسمه عبدالباسط أنا عايز أتجوز وأنا عايزة أتجوز كلمات بقينا بنسمعها كتير الأيام دى ولأن الشباب والبنات مش عارفين يتجوزوا ولا لاقين تكاليف الجواز فبتلاقى كل واحد نفسه يتجوز ولك
مش عارف ومش قادر
ويمكن السبب فى عدم الجواز حاجات كتيرة ومن أهمها تكاليف الجواز اللى بقت عالية أوى وفوق طاقة أى بشر خصوصاً وإحنا فى زمن البطالة والشغل اللى بعقود واللى بملاليم ومايأكلش عيش وللأسف فيه أسر مازالت مصرة على تكاليف الجواز العالية وشبكة بكام ألف ودلوقتى بقت بتعدى العشر تلاف وساعات بتوصل لعشرين ألف وفرش أربع أو خمس أوض يعنى لازم ولابد أوضة نوم وأوضة كمان للأطفال أو للضيوف وسفرة وأنترية وصالون والعفش ما يكونش أقل من كام ألف علشان البرستيج ومنظرنا قدام الناس أمال هنعزم الناس تتفرج على إيه.
ولازم الفرح يبقى فى النادى ولا الفندق الفلانى اللى بكام ألف ده علشان نفرح على أعتبار أن الناس مش هتفرح لو عملوا الفرح فى نادى صغير وتكاليفة بسيطة
ونوصل فى الأخر لشباب مش عارف يتجوز لقلة الفلوس اللى معاه وبنات نفسها تتجوز وأهلها بيغالوا فى الطلبات وطبعا مش كل الناس كده ولكن فيه نسبة منهم كده
وعايزة اسأل سؤال لما بنتك تتجوز واحد مليونير ويعيشها فى قصر وبقى عندها كل حاجة ولكن بيعاملها وحش وأخلاقة مش كويسة ومبهدلها بمعنى أصح .. هيا هتكون مبسوطة بالقصر والعربية والفلوس ولا أنت هتكون مبسوط أن بنتك بتتبهدل؟؟
الحديث الشريف بيقول (إذا جاءكم من ترضون دينه وخلقه فزوجوه ) وبيقول كمان (تُنْكحُ الْمَرْأَةُ لأرْبَعٍ: لمالها ولِحَسَبها ولِجَمَالها وَلدينها: فَاظْفَرْ بذاتِ الدِّينِ تَربَت يَدَاكَ )
ولكن اللى بيحصل دلوقتى يعتبر صفقة ..واحدة وأهلها عايزين واحد عنده قصر ومعاه فلوس وعربية ومش مهم أى حاجة تانية وواحد برضه عايز واحدة غنية وعندها فلوس علشان يقدر يستفيد منها
هو ده أسمه جواز ولا صفقة بين أتنين؟؟
الجواز الصح أنى أدور على واحدة أخلاقها كويسة ومن عيلة ومستوى أجتماعى كويس وتكون فعلا واحدة عندها عقل وفكر وعارفة يعنى إيه تكوين أسرة وعيلة ومساعدة زوج وكفاح معاه ونبدأ من الصفر مع بعض وواحدة واحدة هنكبر وهنحقق آحلامنا.
الجواز الصح أنى أوافق على الشاب اللى أخلاقة كويسة وراجل بمعنى الكلمة وأحس معاه بالأمان حتى لو عايشين فى عشة وكل يوم بناكل عيش حاف ولكن إحساسى بالأمان وبحبه ليا هيخلينى أسعد أنسانة فى الوجود حتى لو مش معانا فلوس عشانا النهاردة ... وكفاحنا مع بعض وأننا نكبر مع بعض ونوصل لطموحنا وآحلامنا هيكون أحلى مليون مرة من أنى أتجوز واحد عنده وعنده وعنده وفى النهاية ما أكونش سعيدة لأنى مش حاسة بالأمان معاه ولأنى حاسة أنى زى الكرسى وجودى مالوش قيمة وأنى قطعة ديكور فى البيت وبس
وعلشان كده بقينا بنشوف أفراح كتيرة ونحس أن العريس والعروسة مش فرحانين لأن ده ماكانش جواز ده كان صفقة عملها الأهل والبيعة كانت الشاب والبنت.
وياما بنشوف أفراح فى أماكن بسيطة وجميلة والعريس والعروسة فى قمة سعادتهم
عايزة أرجع أسمع تانى أغنية أنا هنا هنا يا أبن الحلال مش عايزة جاه ولا كتر مال بحلم بعش أملاه أنا سعد وهنا وفرح وسرور.
وأسمع كمان من الشباب أغنية ياولاد بلدنا يوم الخميس هكتب كتابى وأبقى عريس والدعوة عامة وهتبقى لمة
وكل ده من غير المغالاة فى تكاليف الجواز ومن غير البحث عن الطرف الغنى سواء كان العريس أو العروسة
ياريت نخلى كل حاجة بسيطة علشان حياتنا تبقى أحلى.
إيه يعنى لما أتخطب بدبلة وخاتم وبس إيديا هتقول لأ يا أما شبكة كاملة يا أما مش مدخلة الدبلة والخاتم فى إيدى!!
إيه يعنى لما أستفيد بثمن الشبكة وأجيب بيه أى حاجة محتاجاها فى البيت أنا وعريسى هعمل إيه بالدهب لو ناقصنا حاجات مهمة فى بيتنا!!
إيه يعنى لما يكون بيتنا فى البداية مكون من أوضة نوم وأنترية وسفرة بس ومش لازم يعنى أوضة النوم التانية ولا الصالون التانى دلوقتى مش خلاص يعنى الزيارات مقطعة بعضها ومش هنلاقى مكان نقعد فيه الناس ولا من تانى يوم هيكون عندنا أطفال ومش عارفين ننيمهم فين ...
مفيش مانع نبدأ بحاجات بسيطة وبكره هنكبر وهنجيب باقى الحاجات
ومفيش مانع لو فيه أسرة معاها فلوس وعايزة تجيب لبنتها كل حاجة مفيش مشكلة ولكن مش لازم نخنق الشاب ونقول له لازم أنت كمان تجيب كذا وكذا سيبوا كل واحد على قد مقدرتة
بلاش مغالاة وريحوا الشباب والبنات وسيبوهم يتجوزوا عايزين الناس تفرح زى زمااااااااااااان
|
لو البنت نفسها هيا اللي شايفة ان
